«Тарих естелігі - ұрпақтар сабақтастығы» жобасы 26-27 тамыз аралығында ғалымдар мен өлкетанушылардан жасақталған экспедициялық топ қала іргесіндегі Алға ауданынан бастап, Мұғалжар, Темір, Байғанин аудандарындағы тарихтағы би-батырлар мен әулиелер жерленген, халық құрметіне бөленген киелі орындарды аралады. Экспедициялық топ өңірдегі тарихи тұлғаларға тағзым етумен қатар ел, өңір тарихы туралы тың мәлімет, деректер жинақтап, танысты. Экспедиция мүшелері құрамында Атыраудағы Адай Пір Бекет ата салдырған «Ақ мешіттің» имамы, тарих ғылымдарының кандидаты, Ислам қажы Мырзабай, белгілі ақын, «Құрмет орденінің иегері, қазақ даласының шежірелерін жинап жүрген, дінтанушы және өлкетанушы Светқали Нұржан т.б. азаматтар болды. Экспедиция алғашқы қадамын облыс орталығынан 20 шақырым шамасындағы Бекқұл әулие кесенесіне зияраттан бастау алды.